Luk 11 | BEF | STEP | Mone yupahi Yesu hepa'i moneto buto minoloto nunumu lu su nohago mone koko pana'auba ho tito ma luto lu emi'ehina: Sipi Bo, koyapa'i Yoniu koko panana'a nunumu enelepi'ehina ana suhi huto kai nunumu lelepibe lu'ehina yabe.

Luke 11

Numuna huse'mofihi hapa'a Yesu lu epi'ehina

Mt 6:9-13; 7:7-11

1 Mone yupahi Yesu hepa'i moneto buto minoloto nunumu lu su nohago mone koko pana'auba ho tito ma luto lu emi'ehina: Sipi Bo, koyapa'i Yoniu koko panana'a nunumu enelepi'ehina ana suhi huto kai nunumu lelepibe lu'ehina yabe. 2 Ya noligo Yesu ma luto lu epi'ehina: Lenali nunumu hilune'mu nehitemo ma lite lilo: Afotiga, kai kigika hetofana huto minalibe. Kai kapoka ai huto hino. 3 Nose'nati kai kana'amu kana'amu limilata hubo. 4 Kai foipanati li he'mi letetogo lali ana huto asaga bona'magi foipana nehi letana li he'mi epalalune. To kai sipi fi taga huse'nagu lele'mo memolobo.

5 To Yesu ma luto koko pana'a lu epi'ehina: Lenaliluguti moneuba lalu'afihi nonuga folugu'i buto ma luto lu emilibe: Nalaluo. Kai beleti nose'na loegi monegi nimibo. 6 Mone nalalu'nifu kapo moloto nanitoga o'ehinagi nanitoga nose'na emiluna'a meni'igo kaitogati nimitogo ito buto emilube. 7 To ya luto kehe noitogo ana noha'alugati kalalukafu ma luto lilina'mu yabe: Kafe ahekini loloto'ni yagapana'ni hiti sipalo ako'ohutagu hena hibe luto oto kosele nahanaga luto kehe kehe noine? Nani ko'ohunaguti ho tito buto anana li mekimiluna'mu yabe. 8 Yesu ma lu'ehina: Nani lusiga lu nolepube. Ana bo kai kalalukafu minana'a huto nose'na nimibo luto kehe itamo ai ho tito li mekimilube'mu hilinamoya to kai kubuya mehinogo kehe iba iba huto minata'mu ai kalalukafu alihi ana nose'na ho tito li kimilina'mu yabe. 9 Ya'mu'i nani lu nolepube. Lenali Hu'mamofitoga loka henogo ai ana'ina lepilibe. Lenali ana'ina'mu sa sa huba huba hilete alihi li huto hilabe. Lenali kasito begele begele nehinogo Hu'mau kafe sigi lepalalibe. 10 Asaga bona'i Hu'mamofihi loka holenogo ai ana'ina epilina'mu lilata nehabe. To bo moneuba ana'ina'mu sa sa huloto li huto hulata nohibe. To bo moneuba kasito begele begele nohigo Hu'mau kafe sigi etolata nohibe. 11 To lenaliluguti monepi monepi yagapanatinimagi faya kumu kehe noinogomo osifa'i lite bite epilafi? O'e. 12 To yagapanatini moneuba kokole mu'amu kehe noinogomo kakamuke'i mone lite bite epilafi? O'e. Ya'ma hiti bati mehu'ehibe luto Yesu lu epi'ehina. 13 Yalo ana huto lenali bo foipa'amagita yagapanatini enele'mo hofa telete ana'ina bati hu'ehina enegelo bite epilata nehabe. Ya suhi lito ana huto kokulumalugu nohina bo, Afotinifu, ai'a hapa'a sipi hetofana ni'igo aitoga loka halune'mu nehana Hetofa Sikalafu'a epilina'mu yabe, luto Yesu koko panana'a lu epi'ehina.

Yesu lili'na Bielesebulu hiti lila'ibe li'ahana

Mt 12:22-30; Mk 3:20-27

14 Yesu bo mone foipa feleuba baga'a li hekini lago minolata hina ya Yesu ana foipa fele li he'mi etolago ana bo bagaguti kaga lu'ehina. Ya nohigo boana'i analo minete bu ge'ahana. Enali enelesa ligo enekesa yigi fato fato hi'ahana yabe. 15 Yesu ya hinana bu gelete luga'a bona'magi ma lite li'ahana: Bielesebulu foipa felemagihi sipi kaba'ani nohinago ai ma bomofihi aitogati amuya emi'ehigo yanatu'i foipa fele li nohe'mibe lite li'ahana. 16 To luga'a bona'magi Yesuhi mi'i malalune'mu ma lite lu emi'ahana: Kai kokulumalugu Hu'mamofihi babeyafa'a hu lepibo lite li'ahana. 17 Yesu kaga'ani akeheliloto ma luto lu epi'ehina: Hepa'i moneto bona'i loko hite guna ite mino luga luga hite loe bona'i lolo hite luba hilana ya'mana hepa'i sibina hilina'mu yabe to koguna naga'i mone neminanaguti fuku lite luba hilete fato fato'i minalana enali asaga'i bati mehilana'mu yabe. 18 To Satahi ai naga'a fuku lite loe naga'i hilete enali'ani luba hilana fato fato hite minalana Satahi kapo'a hena huto minalina ni'ibe? Lenali nani kumu'i Bielesebulu amuya emi'ehigo foipa fele li he'mi he'mi nohibe lite nelanamo'mu lenali'i lenoloka nohobe, luto Yesu lu'ehina yabe. 19 To ma'naka luto Bielesebulu amuya emi'ehigo foipa fele li he'mi he'mi nohibe lite nekehelina to kiyi'afu panatini enehe'mago foipa fele li he'mi he'mi nehabe? Ya hu'ehigo enali'ani panatinimagi yasi lolo hilete katini li loko hite kehelilabe. 20 O'e, Hu'mamofihi ai amuya'aloti foipa fele li nohe'mube ya nohugo ana nohunanauba Hu'mamofihi kapo'a anasi lenalitoga a'o leba to'ehibe luto lenubulo huto huloto lenelepilata nohibe.

21 To amuya bo moneuba gimi mage'i huloto nohi fe'noha'a kaba gimi gito minolata nohina ya yogo fe'noha'a bati huto enubu nini minolata nohibe luto Yesu lu'ehina yabe. 22 To lusi amuya bo mone nehetiloto hepa kaba nominalina bo hiti luba hilete ana bo holoto gimi mage'a li su holoto asaga'na gumina lina fe'noha'a guna ito bona'i epilina'mu yabe.

23 Bo mone ai nalalu'nifu legi huto menohilina ai'ya fateha'ni nohibe. To bo moneuba nehe'moto pana'alobo'ni enele'mo nupa mehilina ai ma'naka luto pana'alobo'ni enegene ito enele'mo tili tele hulata nohibe luto Yesu lu'ehina yabe.

Foipa fele aku'i i behe huto o'ehina

Mt 12:43-45

24 Foipa feleuba bona'magi enugufaguti leheko nolimitomo ai ka me'i ninalo mino fulu hilina hepa kumu sa sa hulata nohibe to ana foipa feleuba mino fulu hilina hepa'i sa sa hina bu megotomo ai'a ma luto lulata nohibe: Nani he'mito o'ohuna noha'nilo aku'i bilube luto ana foipa feleuba ekesa yigilata nohibe. 25 Ya luto ekesa yigilotomo ai i behe huto buto he'mito o'ehina noha'a le'mo bati hago gulu gulu luto ni'igo buto ana foipa feleuba bu golata nohibe. 26 To ya hu'ehigo ai aku'i ana noha'aguti heleko limiloto buto nayahi mone kegi'a su hago mone kegi'ati loemo heleko malago foipa fele enele'moto ago ana noha'agu minelata nehabe. Koyapa'i ana bo nesi'a sibina huto minolata hinamo yatai babu foipa fele ete ai gufagu minago aimoya mone'na suhi huto foipa gofana loto sibina bo minolata nohibe, luto Yesu lu'ehina yabe.

Lofokehenaguti minosemofihi hapa'a

27 Yesu ya'mana kaga lu baga ilago a'i moneuba babu bona'magihi folagaha'aniguti ka mone ma luto Yesuhi kehe ito lu emi'ehina: Ai koyapa'i keketoloto amihi kimi'ehina a'uba ai fokehenaguti gelo bito minalibe luto ana a'uba Yesutoga lu'ehina. 28 Ya noligo Yesu ma luto lu emi'ehina: O'yo. To enali bona'i Hu'mamofihi ka'a keheli emite mege'i melete minelata nehana bona'i enali fokehenaguti enegelo bite minalabe luto Yesu ana a'i lu emi'ehina yabe.

Bona'i luga'amagi Yesu kumu topa hose suhi li huto hitogo bu galune li'ahana

Mt 12:38-42

29 Babu bona'i li nupa hite Yesu le'mo folagahi hite minago Yesu ka mone ma luto lu epi'ehina: Yatai boana'ise, bati mehana boana'i nehabe. Enali sipi lili'nakamofi kumu topa hose'na'a Hu'mau bati huto yabe lilina yamofihi hu lelepibo lite noloka nehanaya nani hu meenelepiluna moneko Yonaha topa hose'na'a hu enelepiluna'mu yabe luto Yesu lu'ehina. 30 Koyapa'i Yonau Hu'mamofihi maki'a lolo huto Nineba bonatoga neheti'ehina yabe. Ana suhi huto Kokulumaguti limi'ehina Bo Hu'mamofihi maki'a lolo huto yatai boana'i enalitoga minalina'mu yabe. 31 To kokuluma hiti me'i hiti alihi su nohenogo Hu'mau bona'a enele'mo fato fato nohinogo sipi a'i gihiti a'i yabe lilata nehana a'mouba ai sofo kegi'ati ai'a hiti to yatai boana'i hiti ho tilete ai ana gihiti a'uba foipana'animu'i li yege ho epalalina'mu to enifisa ilina'mu yabe. Hena'mugope ya'mana gihiti a'i ai me'i beleha'aga nominoto kapo moloto Solomoni hetofana huto bona'i mono ka lu epimofa'na nohina nokehelibe. Ya hu'ehina Solomonihi be ligito hoto nohina malo'i ni'ibe to lenali komopatini i gelehe menehanagihe. 32 Kokuluma hiti me'i hiti su nohenogo Hu'mau bona'i enele'mo kehelilube'mu hilina yupahi Nineba bona'i enali ho tilete enali yatai bona'magihi enifisa ilete foipana'animu'i li yege ho epalalina'mu yabe. Hena'mugope enali Nineba bona'magi Yonau lu epina ka'a kehelilete enali komopa'ani li gelehe hi'ehite yabe. Ya hu'ehina yatai Yonahi be ligito nohina maga'ma ni'ibe luto Yesu lu epi'ehina yabe.

Lugufamofihi fana meha'a

Mt 5:15; 6:22-23

33 Bona'magi libi logo'ani li kulu tilete fala kite lapetu ifi tete memelelata nehabe. Enali noha'anigu huto'i mele'ahago besa besa loto ni'igo ana fana meto bona'i bu gelete nonuga bilata nehabe. 34 Kugufamofihi libi'i logo'aya suhi huto kubuka ni'ibe. To kubuka bati huto ni'igomo asaga kugufaka bati huto fana toto minolata nohibe. To kubuka bati mehu'ehigomo asaga kugufaka metepu ito minolata nohibe. 35 Ya hu'ehinagi kai asaga yupahi kaba hu bati hubo fana mehena kailugu nina asaga'i metepu i lalibe'mu nolube. 36 To asaga kugufaka fana mehi huto bai toto mone metepuna nila ya hula mehu'ehinogomo ai besa asaga kapoga bilina'mu yabe. To libi'uba fana meha'a kaitoga besa besa nolana'a hilina'mu hapakamofihi hetofana'a ahuto hilibe.

Felosi bona'i hiti tisa bona'i hiti enali bati mehina suhi li huto hi'ahana

Mt 23:1-36; Mk 12:38-40

37 Yesu ana kaga lu su holago Felosi bo moneuba: Noha'nigu buto nose'na nani'i hiti nalu'ibe luto kehe igo Yesu buto hitalo minoto nose'na nalube'mu hu'ehina. 38 Ya nohigo ana Felosi bouba Yesuhi bu gana ai yahi okala mehuse nose'na nonago ekesa yigi babu lu'ehina yabe. 39 Felosi bouba ya huto ekesa yigi babu noligo Yesu ma luto lu emi'ehina: Lenali Felosi bona'i, lenali asaga yupahi kohatinimofihi fegu'aga le'mo gulu gulu lila to lapetinimofihi fegu gupisa'aga li gulu gulu lilata nehabe. Ya nehana lenali komopatinigu luba huse'na to foipa faipana babu luto bai toto ni'ibe, luto Yesu lu'ehina. 40 Lenali negi nagi bo yabe. Hu'mau ai fegu'aga lolo hu'ehina bouba ai ana huto komopa'aluga lolo mehilina ni'ifihe? 41 Ya hu'ehinagi kai kohakagu to lapekagu ni'ilinana musufalo bona'i epiletogo asaga nasanaka gulu gulu lu su halibe luto Yesu Felosi bona'i lu epi'ehina.

42 Ehe, lenali Felosi bona'ise. Lenali kaba hu bati hilo. Lenali nose'na tu kifina fato fato'i to ketuyafi mamufafi agepafi nayahi luga luga su hago nina to lenali naeni'a nelite moneko'isi Hu'mamofitoga emilata nehabe. Ya hite Hu'mamofitoga komopatini meemise to bona'i enele'mo bati mehi'ahabe. To lenali bona'magihi enele'mo lenemetoga melete minalana to Hu'mamofihi nasana'a lenegekesu mehose emilata nehite komopatini bebe senogo minalana'mu yabe.

43 Ehe, lenali Felosi bona'ise. Lenali mono nonugu sia'a bati hinalo bona folaganugu minelago asaga bona'magi lenebe tigite lenigitini li saga bona folaganugu hilata habe. 44 Ehe, lenali kaba hu bati hilo. Lenali kene mala mala hepa suhi hite fala kite nehago bona'i ifo'alo bila ela nehite lenali kumu'i me'i afeha'alo nehabe lite mekehelilata nehabe, Yesu ya luto Felosi bona'i lu epi'ehina yabe.

45 Keya ka tisa bo moneuba ma luto Yesuhi lu emi'ehina: Babafio, kai ya luto kaga nolutomo lalitoga hiti kaga lu sibina nohu letane luto lu'ehina yabe. 46 Ya ligo Yesu ka'alo lu'ehina: Ehe, lenali keya kaga kehelise bo kaba hu bati hilo. Lenali asaga yupahi boana'i keya kagatinimofihi ana'ina li keta fi epelelago enali enigi'nalo keta'mu filite kofite nebago to lenali lenayahi kosa'atu'i mone anana li enehe'melata menehabe. 47 Ehe lenali'mase. Lenali koyapa'i ligike fakehatinimagi lu huto huto bona'i enehete mamufa gilata kapogu keli he'ahana yatai lenali li hokolo hilete li kuguma hite ana kene mala mala'ani nehabe luto Yesu lu'ehina yabe. 48 Ya'mana hapatinimu'i koyapa ligike fakehatinimagihi enemege'i melete minete lenali komopatini ya'mana hi'ahana sukumu bati hulago neminabe. Enali lu huto huto bona'i enehete keli he'ahago lenali kene mala mala'ani li hokolo hite li kuguma nehabe. 49 Ya hu'ehigo koyapa'i Hu'mamofitoga kaga kehelise'na'a bati huto ni'igo ai ma luto lu'ehina yabe:Nani lu huto huto bona'i hiti kaga lu yege hose bona'i hiti enalitoga enoho lifinogo nehetilenogo bona'magi enegene mane inogo luga koli nefelenogo luga'a enahalabe. 50 Ya hu'ehina enali yatai boana'magi koyapa'i kokuluma'i hiti me'i hiti huto nohigo minete fili'ahana lu huto huto bona'magi kumu lite ka foyagu bite Hu'mau osahi epilinamo ya'ma lilana'mu yabe. 51 Koyapa Ebeli fili'ehina kanaloti oto Sekalaiya ai sipi mono nohi gegisa'agu mamufa gilata hitalo fili'ehinalo yanana'mu asaga'i luto yatai boana'i enalitoga minalina'mu yabe. Ma'naka luto lu nolepube, ya'manana'mu luto mina'a sipi yatai boana'magi ma nehana he'milabe luto Yesu lu'ehina yabe.

52 Ehe, lenali keya kaga kehelise bona'ise. Lenali bona'magi kaga kehelise'na'ani li sibina hilete lenali kaga keheli kapo li hokolo mehise nehago bona'i kaga bati'a kehelilune'mu nehana lenali lu laga hi epelenogo mekehelilata nehago to lenali hiti ana kaga bati'alo mege'i memalalata nehabe, luto Yesu lu'ehina yabe.

53 Yesu ana hepa'i he'mito nobigo Felosi bona'i to loto kaga kehelise bona'magi enali ipakafa Yesuhi helete enali amuya enipa hulago kaga Yesunugu lu bilune lite li'ahana. Ya hite enali 54 Yesuhi bagalo ka fato fato babeyafa hite loka helete kaba bagalo hi'ehite ka mone sibina'a nolinogomo ka foyagu le'mo malalune lite hi'ahana yabe.